प्रसारण र वितरण लाइन मर्मतपछि मुस्ताङ र अन्नपूर्णमा फेरि नियमित बिजुली

हालैको झरी र बाढीपहिरोले असर गरेको म्याग्दीको अन्नपूर्ण गाउँपालिका र मुस्ताङमा बिजुली आपूर्ति फेरि नियमित भएको छ। क्षतिग्रस्त प्रसारण र वितरण लाइन मर्मत गरेपछि आपूर्ति सुचारु गरिएको हो।

यही असोज ८ देखि ११ गतेसम्म परेको झरीपछि कालीगण्डकी क्षेत्रमा आएको बाढीपहिरोले यी क्षेत्रको बिजुली प्रणालीमा असर पारेको थियो। त्यसपछि दुवै ठाउँमा आपूर्ति प्रभावित भएको थियो।

वितरण केन्द्रका प्रमुख चापागाईंका अनुसार थापाखोला र घलेम्दीखोला जलविद्युत् आयोजनाबाट नौ मेगावाट बिजुली उत्पादन गरी ३३ केभी लाइनमा जोडिएको छ। यही बिजुलीबाट अन्नपूर्ण गाउँपालिका र मुस्ताङमा आपूर्ति गरिएको उनले बताए।

बिजुली फेरि नियमित भएपछि बाढीपहिरो प्रभावित यी क्षेत्रका स्थानीयवासीले राहत पाएका छन्।