वरिष्ठ कलाकार नीर शाहलाई अमरभावना राष्ट्रिय स्रष्टा सम्मान

वरिष्ठ कलाकार तथा गीतकार नीर शाहलाई 'अमरभावना राष्ट्रिय स्रष्टा सम्मान' प्रदान गरिएको छ। गीतकार सङ्घ नेपालको १७औँ वार्षिकोत्सवमा काठमाडौँमा भएको समारोहमा उहाँलाई करिब डेढ लाख रुपैयाँ नगदसहित सम्मानपत्र दिइएको छ, माला र दोसल्लाले पनि सम्मान गरिएको छ। शाहले पाँच दशकभन्दा बढी समयदेखि नेपाली कला र गीत-सङ्गीतमा योगदान गर्दै आउनुभएको छ।

'बादल बनाई देऊ आकार बदल्न सकुँ', 'गहिराइमा डुब्दै नडुब', 'पर्खी बसेँ आउला भनी', 'प्यारी वसन्ती' र 'पसिनाको जलैले' उहाँका चर्चित गीत हुन्। 'तिमीसँग डुङ्गामा घुम्दा घुम्दै फेवाताल', 'हिउँभन्दा चिसो, आगोभन्दा तातो', 'खुल्दैन ताल्चा त्यो ढोकाको' र 'आँखैमा कसैको तस्बिर' पनि उहाँकै रचना हुन्। 'कहिलेकाहीँ हाँस्छु धेरै नै हाँस्छु' र 'अर्को जुनी चाहिँदैन मलाई' पनि श्रोतामाझ लोकप्रिय छन्।

समारोहमा विदेशमा बसेर गीत लेख्दै आएका नीलम आङ्बुहाङ राईलाई यस वर्षको 'डायस्पोरा गीतकार सम्मान' दिइएको छ। 'पुरानो हुँदैन माया' र 'पानी मिठो मेरो हजुर इलाम बजारको' राईका लोकप्रिय गीत हुन्।