भक्तपुरमा इन्द्रजात्रासँगै तीन दिने मुपात्र जात्रा सुरु

भक्तपुरमा इन्द्रजात्राका क्रममा हुने तीन दिने मुपात्र जात्रा सोमबार साँझदेखि सुरु भएको छ। भक्तपुरको इन्द्रजात्राको छैटौँ, सातौँ र आठौँ दिन यो जात्रा हुने परम्परा छ। पहिलो दिन दत्तात्रय नजिकैको भक्तपुर नगरपालिका वडा नं ९ सकुलान टोलबाट जात्रा निस्किएको थियो।

राक्षसको पोसाक लगाएर अनुहारमा रङ्ग पोतेका र तरबार बोकेका तीन जनामध्ये बीचमा मुपात्र र दुवै छेउमा उनका सहायक धि:चा थिए। उनीहरूले नगर परिक्रमा गर्दै ठाउँठाउँमा रहेका यमद्य लिङ्गोलाई तीन पटक तरबारले प्रहार गरेर तीन फन्को लगाएका थिए। इन्द्रपुत्र जयन्तको प्रतीक मानिने यमद्य इन्द्रजात्राको पहिलो दिन नगरका २१ स्थानमा ठड्याइन्छ।