विश्व पर्यटन दिवसमा नाट्टाले सुरु गर्‍यो 'नेपाल खुला छ' अभियान

नेपाल एसोसिएसन अफ टुर एन्ड ट्राभल एजेन्ट्स, नाट्टाले ४७औँ विश्व पर्यटन दिवसको अवसरमा 'नेपाल खुला छ' र 'नेपाल बोलाउँदै छ' अभियानअन्तर्गत दुई दिने विशेष कार्यक्रम सुरु गरेको छ। नेपाल विदेशी पर्यटकका लागि पूर्ण रूपमा सुरक्षित, सञ्चालनयोग्य र खुला रहेको सन्देश विश्वभर पुर्‍याउन कार्यक्रम गरिएको नाट्टाका महासचिव राजकुमार देवकोटाले बताउनुभएको छ। पहिलो दिन आज शनिबार बिहान 'नाट्टा स्वच्छ र हरियाली अभियान–२०२६' अन्तर्गत शिवपुरी–नागार्जुन राष्ट्रिय निकुञ्ज करिडोरको बूढानिलकण्ठ, टोखा र चण्डेश्वरी क्षेत्रमा सरसफाइ गरिएको छ।

विश्व पर्यटन दिवस मनाइने दिन भोलि असोज ११ गते आइतबार बिहान ७ बजे सम्पदा दौड आयोजना हुनेछ। दौडलाई 'नेपाल निम्तो–नाट्टा सम्पदा दौड–२०२६' नाम दिइएको छ। काठमाडौँ दरबार क्षेत्र वसन्तपुरबाट सुरु हुने करिब ६ किलोमिटरको दौड पाटन दरबार क्षेत्रमा पुगेर सम्पन्न हुनेछ।

दौडमा पर्यटन व्यवसायी, पर्यटनसँग सम्बन्धित सङ्घसंस्थाका प्रतिनिधि, युवा र सर्वसाधारण सहभागी हुने महासचिव देवकोटाले जानकारी दिनुभएको छ।