साउन–भदौमा कृषिजन्य वस्तुको आयात ८७ अर्बभन्दा बढी, तेल र तरकारीको भाग ठूलो

चालु आर्थिक वर्षको पहिलो दुई महिनामा नेपालले करिब ८७ अर्ब रुपैयाँ बराबरको कृषि तथा खाद्यजन्य वस्तु आयात गरेको छ। भन्सार विभागको तथ्याङ्कअनुसार साउन र भदौमा भएको यो आयात अघिल्लो वर्षको सोही अवधिको करिब ५९ अर्ब रुपैयाँभन्दा झन्डै २८ अर्ब रुपैयाँले बढी हो। आयातमा सबैभन्दा ठूलो हिस्सा वनस्पति तथा पशुपन्छीजन्य चिल्लो पदार्थ र तेलको छ।

यस्ता वस्तुको आयात करिब २७ अर्बबाट बढेर झन्डै ४९ अर्ब रुपैयाँ पुगेको छ। तेलहन, औद्योगिक तथा औषधीय वनस्पति र घाँसपातको आयात तीन गुणाभन्दा धेरै बढेर करिब ९ अर्ब रुपैयाँ पुगेको छ। तरकारी तथा कन्दमूलको आयात ४३ प्रतिशतभन्दा बढीले वृद्धि भई झन्डै ८ अर्ब रुपैयाँ पुगेको विभागको तथ्याङ्कमा उल्लेख छ।

यसको विपरीत धान, चामल, मकै र गहुँजस्ता मुख्य खाद्यान्नको आयात घटेको छ। खाद्यान्न आयात करिब ९ अर्बबाट झरेर ६ अर्ब रुपैयाँमा सीमित भएको छ। फलफूल, ओखर र बदामको आयात सामान्य घटेर करिब साढे ५ अर्ब रुपैयाँ कायम छ।

जीवित जनावरको आयात करिब डेढ करोडबाट झन्डै ९ करोड रुपैयाँ पुगेको छ। माछा तथा जलचरको आयात करिब १६ करोडबाट बढेर झन्डै २४ करोड रुपैयाँ पुगेको छ। दुग्धजन्य पदार्थ, अण्डा र महको आयात भने घटेको तथ्याङ्कले देखाएको छ।