चाडपर्व नजिकिँदा बजार अनुगमन: म्याद गुज्रेका सामग्रीबाट मिठाई र पुष्टकारी

चाडपर्व नजिकिँदा काठमाडौँ उपत्यकामा म्याद गुज्रेका र किरा परेका कच्चापदार्थबाट गुँदपाक र पुष्टकारी बनाइएको खाद्य प्रविधि तथा गुण नियन्त्रण विभागको अनुगमनमा फेला परेको छ। चन्द्रागिरि–१५ ढुंगेअड्डाका दुई मिठाई उद्योगमा म्याद नाघेका चिउरा, चकलेट र बिस्कुट तथा किरा लागेको चना, चनाको पिठो र बदाम प्रयोग भएको विभागले जनाएको छ। श्री कृष्ण पुष्टकारी तथा गुँदपाक भण्डारमा सबैभन्दा धेरै अखाद्य कच्चापदार्थ भेटिएपछि उद्योग सिलबन्दी गरिएको छ।

त्यहाँ बनेका ५ सय किलोभन्दा बढी गुँदपाक र पुष्टकारी जफत गरी नष्ट गरिएको छ। अर्को उद्योग बज्रबाराही भण्डारमा लेबलमा नखुलेका शंकास्पद कच्चापदार्थ प्रयोग भएको पाइएपछि करिब ३ सय ५० किलो तयारी खाद्य पदार्थ नष्ट गरी उद्योग सिल गरिएको छ। अनुगमनका क्रममा करिब २ लाख ६० हजार रुपैयाँ बराबरको सामान नष्ट गरिएको छ।

स्वयम्भूको एक पसलमा म्याद नाघेका खाद्य पदार्थ बिक्रीमा राखिएको पाइएको छ। विभागले एक चिया उद्योगका म्याद नाघेका वा दूषित उत्पादन बजारबाट फिर्ता गर्ने निर्णय पनि गरेको छ।