झरीले धानबालीमा जोखिम, अहिले धान नकाट्न किसानलाई आग्रह

लगातारको वर्षाले बाढी र पहिरोको जोखिम बढेपछि जल तथा मौसम विज्ञान विभागले किसानलाई मौसम नखुलेसम्म धान नकाट्न आग्रह गरेको छ। विभागका मौसमविद् रोजन लामिछानेले प्रतिकूल मौसममा हतारमा धान काट्दा बाली र जनधन दुवैमा क्षति हुन सक्ने बताउनुभएको छ। उहाँका अनुसार देशको पूर्वी भूभागबाट मौसम बिस्तारै सुधार हुन थालेको छ।

विभागको आजको पूर्वानुमानअनुसार गण्डकी, लुम्बिनी, कर्णाली र सुदूरपश्चिमका थोरै स्थानमा भारीदेखि धेरै भारी वर्षाको सम्भावना छ। भोलि लुम्बिनी र सुदूरपश्चिमका एक–दुई स्थानमा अति भारी वर्षा हुन सक्ने विभागले जनाएको छ। वीरेन्द्रनगर, नेपालगञ्ज र पोखरामा आज वर्षाको सम्भावना १०० प्रतिशत छ।

जमिन चिरिएका वा साना पहिरो देखिएका ठाउँका बासिन्दालाई तुरुन्त सुरक्षित स्थानमा सर्न र छिमेकीलाई पनि सचेत बनाउन विभागले अनुरोध गरेको छ। नदी किनारमा बस्नेहरूलाई उच्च सतर्कता अपनाउन पनि भनिएको छ। यसैबीच, चितवनमा पसाउने र परागसेचनको चरणमा रहेको धानमा झरीका कारण फोकटा दाना बस्ने र दाग लाग्ने जोखिम देखिएको कृषि विकास कार्यालय चितवनका प्रमुख झलकनाथ कँडेलले बताउनुभएको छ।

कार्यालयले भरतपुर–१४ पकौडीमा बाली उपचार शिविर चलाएको छ र रत्ननगरमा पनि शिविर गर्ने तयारी गरेको छ। बाली संरक्षण अधिकृत गीता केसीका अनुसार धानमा समस्या लिएर कार्यालय आउने किसान बढेपछि शिविर सुरु गरिएको हो।