महिला उद्यमीका उत्पादन बिक्री गर्न जमलमा असोज १७ देखि 'चेम्बर बजार'

महिला उद्यमी र व्यवसायीले बनाएका सामान बजारसम्म पुर्‍याउन, तिनको प्रचार गर्न र कारोबार बढाउन नेपाल महिला चेम्बरले शनिबार, असोज १७ गतेदेखि 'चेम्बर बजार' सञ्चालन गर्ने भएको छ। काठमाडौँको जमलस्थित चेम्बर अफ कमर्स भवनमा लाग्ने बजारमा खाद्यान्न, लत्ताकपडा र हस्तकलाका सामग्री बिक्रीमा राखिनेछन्। बजारमा साल्ट ट्रेडिङलगायतका स्टल रहनेछन् भने आयात र निर्यातसँग जोडिएका वस्तुको पनि प्रवर्द्धन गरिनेछ।

व्यवसाय चलाइरहेका र नयाँ उद्यम थाल्न चाहने महिलाका लागि सरकारी प्रक्रिया र कारोबार सञ्चालनबारे अभिमुखीकरण, सीप र व्यावसायिक तालिम, महिला स्वास्थ्यबारे सचेतना र निःशुल्क स्वास्थ्य परीक्षण पनि गरिने चेम्बरकी अध्यक्ष उर्मिला श्रेष्ठले बताउनुभएको छ। चाडपर्वका बेला हरेक शनिबार र आइतबार बजार लाग्नेछ। चाडपछि भने शनिबार मात्र बजार चलिरहने उहाँले जानकारी दिनुभएको छ।