असोज २२ को त्रिवि सभा बैठकप्रति प्राध्यापक, विद्यार्थी र कर्मचारीको आपत्ति

त्रिभुवन विश्वविद्यालयले असोज २२ गते बोलाएको विश्वविद्यालय सभा बैठकप्रति प्राध्यापक, विद्यार्थी र कर्मचारी प्रतिनिधिले आपत्ति जनाएका छन्। नेपाल प्राध्यापक संघ, त्रिवि प्राध्यापक संघ, त्रिवि कर्मचारी संघ, स्ववियु र सभाका सदस्यले संयुक्त विज्ञप्ति निकालेर बैठक बोलाउने प्रक्रियामाथि प्रश्न उठाएका छन्। त्रिवि ऐन, २०४९ ले सभामा ५ जना निर्वाचित प्राध्यापक, स्ववियु अध्यक्षमध्ये २ जना र तीनवटै संघको उपस्थिति सुनिश्चित गरेको उनीहरूको दाबी छ।

सरकारले ल्याएको अध्यादेश निष्क्रिय भएको र त्यसको सट्टा अर्को कानुन नबनेकाले पुरानै ऐन लागू हुने विज्ञप्तिमा उल्लेख छ। ऐनअनुसार बैठकको सूचना र कार्यसूची कम्तीमा १५ दिनअघि सदस्यलाई पठाउनुपर्ने उनीहरूको भनाइ छ। कानुनविपरीत सभा बस्न नसक्ने उनीहरूको अडान छ।

यता, असोज २२ को बैठकले बजेट र विद्यार्थीको ग्रेस सूची पारित गर्ने त्रिवि प्रवक्ता नवीन्द्र भण्डारीले बताउनुभएको छ। पदाधिकारी नियुक्तिमा ढिलाइ हुँदा बजेट पारित गर्ने काम महिनौँदेखि रोकिएको थियो। सभा बस्न नसक्दा नीति तथा कार्यक्रम र स्नातक सूची पनि स्वीकृत हुन सकेका छैनन्।