बर्दियाको संरक्षण क्षेत्रमै कृष्णसारको सङ्ख्या घट्दै

बर्दियाको गुलरियामा रहेको कृष्णसार संरक्षण क्षेत्रभित्रै दुर्लभ कृष्णसारको सङ्ख्या घट्दै गएको छ। संरक्षण क्षेत्रका अनुसार गत आर्थिक वर्ष २०८२/८३ को अन्त्यमा करिब २४२ रहेका कृष्णसार अहिले करिब २१० मा झरेका छन्। तीन महिनामै ३२ वटा कम भएका छन् र तीमध्ये २० वटाको अवस्था अझै पत्ता लागेको छैन।

संरक्षण क्षेत्रका प्रमुख उत्तमकुमार चौधरीका अनुसार चालु आर्थिक वर्षमा चितुवा र कुकुरको आक्रमण तथा प्राकृतिक कारणले १२ वटा कृष्णसार गुमेका छन्। गत आर्थिक वर्षमा पनि शिकारी जनावरको आक्रमण र प्राकृतिक कारणले करिब ४२ कृष्णसार गुमेका थिए। संरक्षण क्षेत्रका कर्मचारीका अनुसार बच्चा जन्माउने याममा कृष्णसार चितुवा, हुँडार र छाडा कुकुरको निशानामा बढी पर्ने जोखिम हुन्छ।