युवाका लागि सरकारको निःशुल्क अनलाइन एआई तालिम

सरकारले युवाका लागि कृत्रिम बौद्धिकता अर्थात् एआईसम्बन्धी निःशुल्क अनलाइन तालिम सञ्चालन गर्ने भएको छ। युवा, श्रम तथा रोजगार मन्त्रालयअन्तर्गतको राष्ट्रिय व्यावसायिक प्रशिक्षण प्रतिष्ठानले 'एआईको प्रभावकारी प्रयोग तथा प्रम्प्ट लेखन' विषयमा यो तालिम आयोजना गर्न लागेको हो। तालिम कात्तिक १८ र १९ गते चार छुट्टाछुट्टै सत्रमा हुनेछ।

एउटा सत्रमा ५०० जनासम्म गरी जम्मा २ हजार युवाले भाग लिन सक्नेछन्। सहभागीलाई च्याटजीपीटी र क्लडजस्ता एआई उपकरण चलाउने तरिका र प्रम्प्ट लेख्ने सीप सिकाइनेछ। एआईको मद्दतले इमेल, टिपोट र प्रस्तुतीकरण तयार गर्ने अभ्यास पनि गराइनेछ।

तस्बिर र भिडियो बनाउने, एआईको जिम्मेवार प्रयोग गर्ने र त्यसले दिएको जानकारीको सत्यता जाँच्ने विधि पनि तालिममा समेटिएका छन्।