एआईलाई ‘सुपर इन्टेलिजेन्स’ भन्ने अमेरिकी निर्णयको चीनद्वारा सम्मान

चीनले अमेरिकी प्रशासनले ‘आर्टिफिसियल इन्टेलिजेन्स’ अर्थात् एआईलाई ‘सुपर इन्टेलिजेन्स’ भन्न थालेको निर्णयको सम्मान गर्ने जनाएको छ। चिनियाँ विदेश मन्त्रालयले शनिबार जारी गरेको विज्ञप्तिमा अमेरिकाले रोजेको शब्दावलीको सम्मान गर्ने उल्लेख छ। राष्ट्रपति डोनाल्ड ट्रम्पले मङ्गलबारदेखि अमेरिकी प्रशासनका आधिकारिक सञ्चारमा पुरानो शब्दको सट्टा नयाँ शब्द प्रयोग हुने घोषणा गर्नुभएको थियो।

यसै साता वासिङ्टनमा ट्रम्प र चिनियाँ राष्ट्रपति सी जिनपिङबीच भएको शिखर वार्तामा कृत्रिम बुद्धिमत्ता प्रमुख कार्यसूचीमा थियो। वार्तापछि ट्रम्पले सामाजिक सञ्जालमा राष्ट्रपति सीलाई पनि नयाँ शब्द बढी उपयुक्त लागेको दाबी गर्नुभएको थियो। उहाँले पुरानो नामलाई कमजोर र गलत भन्दै ‘सुपर इन्टेलिजेन्स’ लाई बढी सही नाम बताउनुभएको थियो।

चीनले भने ट्रम्पको उक्त दाबीको न पुष्टि गरेको छ, न खण्डन। विज्ञप्तिमा एआई प्रविधि लगातार विकसित भइरहेको भन्दै सबै पक्षबीच संवाद, अनुभव साटासाट र सहमति निर्माण आवश्यक रहेको उल्लेख छ। शिखर वार्तापछि दुवै देशले एआईसम्बन्धी समन्वय र आकस्मिक घटनाको जानकारी आदानप्रदानका लागि विशेष सञ्चार संयन्त्र बनाउने सहमति गरेका छन्।

ट्रम्पले एआईले मानवतामा गम्भीर जोखिम ल्याउन सक्ने चिन्तालाई बारम्बार अस्वीकार गर्दै आउनुभएको छ। राष्ट्रपति सीले भने यसको विकास मानवीय नियन्त्रण र जिम्मेवार प्रयोगको दायराभित्र हुनुपर्ने धारणा राख्दै आउनुभएको छ।