साउदी अरबमाथि हुथी आक्रमण बढ्यो, ड्रोन र क्षेप्यास्त्र रोकिएको दाबी

यमनका हुथी विद्रोहीले साउदी अरबमाथि आक्रमण तीव्र बनाएपछि साउदी नेतृत्वको गठबन्धनले शनिबार २ ड्रोन र २ ब्यालेस्टिक क्षेप्यास्त्र रोकेको जनाएको छ। गठबन्धनका प्रवक्ताका अनुसार हवाई प्रतिरक्षा प्रणालीले राजधानी रियादतर्फ प्रहार गरिएका ड्रोन पहिचान गरी नष्ट गरेको हो। दक्षिणपश्चिमी सहर खमिस मुशैततर्फ आएका क्षेप्यास्त्र पनि रोकिएका छन्, जहाँ एउटा महत्त्वपूर्ण हवाई सैनिक अड्डा छ।

इरान समर्थित हुथी समूहका आक्रमण गत जुलाईदेखि निरन्तर बढिरहेका छन् र लामो युद्धविराम टुटेपछि यमनको द्वन्द्व चर्किएको छ। हुथी समूहले साउदी अरबमाथि समुद्री नाकाबन्दी लगाएको, तेल ढुवानी गर्ने जहाजमा आक्रमण गरेको र लाल सागर तटमा नियन्त्रण फैलाएको दाबी गरिएको छ। यसले ऊर्जा बजारमा समेत असर पारेको बताइएको छ।

हुथी राजनीतिक ब्युरोका सदस्य हेजाम अल–असदले हालको अभियान पूर्ण युद्धका लागि सानो अभ्यास मात्र भएको बताउनुभएको छ। खाडी सहयोग परिषद्का महासचिव जासेम मोहम्मद अल्बुदाइवीले आक्रमणलाई साउदी सार्वभौमसत्ताको गम्भीर उल्लंघन भन्दै निन्दा गर्नुभएको छ। उहाँले अन्तर्राष्ट्रिय समुदायलाई हुथी समूहलाई जवाफदेही बनाउन दृढ कदम चाल्न आग्रह गर्नुभएको छ।

यमनको शासकीय निकायका प्रमुख रशाद अल–अलिमीले शुक्रबार देशभर आम परिचालनको आह्वान गर्नुभएको थियो। संयुक्त राष्ट्रसङ्घका अनुसार अगस्टदेखि यमनमा करिब १ लाख ३८ हजार मानिस विस्थापित भएका छन्, जसमध्ये झन्डै ७० हजार बालबालिका छन्।