इरानको युद्धविराम र होर्मुज खोल्ने प्रस्ताव ट्रम्पले अस्वीकार गरे, इरानको चेतावनी

अमेरिकी राष्ट्रपति डोनाल्ड ट्रम्पले होर्मुज जलमार्ग खोल्ने र युद्धविराम गर्ने इरानको नयाँ प्रस्ताव अस्वीकार गर्नुभएको छ। अमेरिकी पत्रिका वाल स्ट्रिट जर्नलले यो जानकारी दिएको छ। इरानी विदेशमन्त्री अब्बास अराग्चीले न्युयोर्कमा मध्यस्थकर्तामार्फत ७ दिने युद्धविराम र ७ दिनभित्र जलमार्ग पुनः सञ्चालन गर्ने प्रस्ताव राख्नुभएको थियो।

उक्त प्रस्ताव गत जुनमा भएको समझदारीमा आधारित थियो, जसमा तेल निर्यातमाथिको प्रतिबन्धमा छुट र समुद्री आवागमन सामान्य बनाउने विषय थिए। पत्रिकाका अनुसार इरानले सर्त पालना गर्नेमा अमेरिका विश्वस्त छैन र आणविक कार्यक्रमसमेत समेट्ने व्यापक सम्झौता चाहन्छ। राष्ट्रसङ्घको ८१औँ महासभामा ट्रम्पले इरानलाई ध्वस्त पार्ने चेतावनी दिनुभएको थियो।

उहाँले पुनः बमबारी सुरु हुन सक्ने चेतावनी पनि दिनुभएको छ। यसैबीच इरानको उच्च सैन्य कमान्ड मुख्यालयले आक्रमण भए अमेरिकी सैन्य केन्द्र ध्वस्त पार्ने चेतावनी दिएको छ। इरानी अर्धसरकारी समाचार संस्था मेहरका अनुसार इरान युद्ध सुरु गर्दैन, तर आक्रमण भए प्रतिरक्षामा कुनै कसर बाँकी राख्दैन।

मेहरले संवेदनशील इलाकामा अमेरिकी सैन्य गतिविधि पनि जारी रहेको जनाएको छ। शुक्रबार राष्ट्रसङ्घ मुख्यालयमा पत्रकारसँग कुरा गर्दै अराग्चीले अमेरिकाले सर्त पूरा गरेपछि मात्र होर्मुज खोल्ने प्रक्रिया अघि बढ्ने बताउनुभएको थियो। इरानले सम्झौताका लागि आफूलाई कुनै हतार नभएको पनि जनाएको छ।