रुसी ड्रोन आक्रमणपछि किएभका निप्रो नदीमाथिका दुई पुलमा यातायात अवरुद्ध

रुसी ड्रोन आक्रमणपछि युक्रेनको राजधानी किएभमा निप्रो नदीमाथिका दुई प्रमुख पुलमा सवारी आवागमन अवरुद्ध भएको छ। किएभका मेयर भिटाली क्लिट्स्कोका अनुसार दक्षिणी पुल दुवै दिशातर्फ पूर्ण रूपमा बन्द गरिएको छ। प्याटन पुलमा भने एउटा मात्र बाटो खुला राखिएको उहाँले शुक्रबार जानकारी दिनुभएको छ।

रुसी ड्रोनले दक्षिणी पुलको संरचनामा प्रहार गरेपछि अवस्था जाँच्न सुरुमा उक्त पुल बन्द गरिएको थियो। जाँचपछि पुलमा सवारी साधन र मेट्रो सेवा पुनः चलाइएको थियो। तर बिहीबार राति सोही पुलमा फेरि आक्रमण भएपछि त्यसलाई दोस्रोपटक बन्द गर्नुपरेको मेयर क्लिट्स्कोले बताउनुभएको छ।

प्याटन पुलमा भने आक्रमण भएको कुनै सूचना प्राप्त नभएको उहाँको भनाइ छ। यसैबीच, किएभको डार्नित्स्की जिल्लास्थित एउटा २५ तले आवासीय भवनमा पनि आक्रमण भएको आपत्कालीन सेवाले जनाएको छ। पछिल्ला महिनाहरूमा किएभमाथि रुसी ड्रोन तथा क्षेप्यास्त्र आक्रमण क्रमशः बढ्दै गएको छ।