अष्ट्रेलियामा लगातार दोस्रो त्रैमासमा रिक्त पद घटे

अष्ट्रेलियामा रोजगारीका रिक्त पद लगातार दोस्रो त्रैमासिक अवधिमा घटेका छन्। अष्ट्रेलियाली तथ्याङ्क ब्युरोका अनुसार अगस्टसम्मको तीन महिनामा रिक्त पद करिब ०.९ प्रतिशतले घटेका छन्। यो अवधिमा झन्डै ३ हजार पद घटेर कुल सङ्ख्या करिब ३ लाख २५ हजारमा झरेको ब्युरोले जनाएको छ।

मेसम्मको तीन महिनामा पनि रिक्त पद करिब २.२ प्रतिशतले कम भएका थिए। पछिल्लो गिरावट मुख्यतः निजी क्षेत्रमा देखिएको छ, जहाँ करिब २ प्रतिशत अर्थात् झन्डै ५ हजार ८ सय पद घटेका छन्। सार्वजनिक क्षेत्रमा भने रिक्त पद करिब ७.८ प्रतिशत अर्थात् झन्डै २ हजार ८ सयले बढेका छन्।

निजी क्षेत्रभित्र थोक व्यापारमा करिब १८ प्रतिशत र प्रारम्भिक सेवा क्षेत्रमा करिब १७.३ प्रतिशत रिक्त पद घटेका छन्। खुद्रा व्यापारमा भने रिक्त पद करिब २४.५ प्रतिशतले बढेका छन्। वित्तीय तथा बीमा सेवामा पनि करिब १४.१ प्रतिशत वृद्धि भएको छ।

अगस्टसम्मको एक वर्षलाई आधार मान्दा देशभरका रिक्त पद करिब १.३ प्रतिशतले कम भएका छन्। नेपाल राष्ट्र बैंकको पछिल्लो विनिमय दरअनुसार एक अष्ट्रेलियाली डलरको खरिद दर १०६ रुपैयाँ ६१ पैसा र बिक्री दर १०७ रुपैयाँ ३ पैसा छ।