जापानमा पाँच महिनापछि बेरोजगारी दर बढेर २.५ प्रतिशत

जापानमा अगस्ट महिनाको बेरोजगारी दर करिब २.५ प्रतिशत पुगेको छ, जुन पाँच महिनायता पहिलो वृद्धि हो। जापान सरकारले शुक्रबार सार्वजनिक गरेको तथ्याङ्कअनुसार जुलाईमा यो दर करिब २.४ प्रतिशत थियो। आन्तरिक मामिला तथा सञ्चार मन्त्रालयका अनुसार अगस्टमा काममा रहेका व्यक्तिको सङ्ख्या अघिल्लो महिनाभन्दा करिब ३० हजारले बढेर मौसमी समायोजनपछि झन्डै ६ करोड ८३ लाख ४० हजार पुगेको छ।

जागिर छाड्नेमध्ये करिब ८ लाख १० हजारले आफ्नै इच्छाले काम छाडेका हुन्। अझ राम्रो कामको खोजीमा जागिर छाड्नेको सङ्ख्या जुलाईको तुलनामा करिब ८ प्रतिशतले बढेको मन्त्रालयले जनाएको छ। रोजगारदाताले काम छुटाएकाको सङ्ख्या झन्डै ४ लाख पुगेको छ, जुन अघिल्लो महिनाभन्दा करिब ५.३ प्रतिशत बढी हो।

नयाँ रोजगारी खोज्नेको सङ्ख्या पनि करिब २.२ प्रतिशतले बढेर झन्डै ४ लाख ६० हजार पुगेको छ। स्वास्थ्य, श्रम तथा कल्याण मन्त्रालयको छुट्टै तथ्याङ्कअनुसार अगस्टमा प्रत्येक १०० रोजगार खोज्नेका लागि करिब ११८ अवसर उपलब्ध थिए, जुन जुलाईकै बराबर हो। ११ मध्ये ८ क्षेत्रमा रोजगारीका अवसर घटेका छन्।

होटल तथा रेस्टुरेन्टमा करिब ११.१ प्रतिशत र थोक तथा खुद्रा व्यापारमा करिब १०.२ प्रतिशत कमी आएको छ। उत्पादन क्षेत्रमा भने करिब ३.९ प्रतिशत र सूचना तथा सञ्चारमा करिब ३.३ प्रतिशत अवसर बढेका छन्। नेपाल राष्ट्र बैंकको पछिल्लो दरअनुसार १० जापानी येनको खरिद दर ९ रुपैयाँ ७१ पैसा र बिक्री दर ९ रुपैयाँ ७५ पैसा छ।