फ्रान्समा विद्यार्थी आन्दोलन चर्कियो, ५६० भन्दा बढी विद्यालयमा पढाइ प्रभावित

फ्रान्समा उच्च माध्यमिक विद्यालयका विद्यार्थीले सुरु गरेको आन्दोलन थप चर्किएको छ र शिक्षा मन्त्रालयका अनुसार देशभरका ५६० भन्दा बढी विद्यालयमा पढाइ प्रभावित भएको छ। पेरिस क्षेत्रबाट थालिएको आन्दोलन केही दिनमै देशभर फैलिएको हो। अन्तिम वर्षका विद्यार्थीले विद्यालयको मूल ढोका अवरुद्ध गर्दै लामो कक्षा अवधि, कमजोर भौतिक पूर्वाधार, अत्यधिक गर्मी हुने कोठा र शिक्षक अभावविरुद्ध आवाज उठाएका छन्।

पेरिसको टुर्गो विद्यालयका एक विद्यार्थीले वर्षभरि विज्ञान शिक्षक र पाठ्यपुस्तकसमेत नपाएको गुनासो गरेका छन्। शुक्रबार पेरिसका लियोनार दे भिन्सी र गास्तों–बाशलार विद्यालयको प्रवेशद्वारमा आगो लगाइएको थियो, जसलाई दमकलले नियन्त्रणमा लियो। शिक्षामन्त्री एडुआर जफ्रेले विद्यार्थीका केही माग जायज भए पनि आन्दोलन अत्यधिक हिंसात्मक समूहको हातमा पुगेको आरोप लगाउनुभएको छ।

उहाँका अनुसार १०० भन्दा बढी विद्यालयमा गम्भीर क्षति पुगेको छ। विद्यार्थीले भने प्रहरीले अत्यधिक बल र अश्रुग्यास प्रयोग गरेको आरोप लगाएका छन्। राष्ट्रपति निर्वाचनमा करिब छ महिना बाँकी रहँदा सरकारले वामपन्थी दल फ्रान्स अनबोले आन्दोलन उचालेको आरोप लगाएको छ।

दलका वरिष्ठ नेता म्यानुएल बोम्पारले भने उक्त आरोपलाई षड्यन्त्रको सिद्धान्त भन्दै अस्वीकार गर्नुभएको छ।