विश्व पर्यटन दिवसमा पोखरा लेकसाइडमा मिनी सडक महोत्सव

विश्व पर्यटन दिवसका अवसरमा आइतबार असोज ११ गते साँझ पोखराको लेकसाइडमा मिनी सडक महोत्सव आयोजना हुने भएको छ। रेस्टुरेन्ट एन्ड बार एसोसिएसन अर्थात् रेवान पोखराले पत्रकार सम्मेलन गरी महोत्सवको जानकारी दिएको छ। महोत्सवमा पोखराको मौलिक संस्कृति, स्थानीय कला, स्वदेशी तथा विदेशी परिकार र आतिथ्य प्रस्तुत गरिनेछ।

कार्यक्रममा सांस्कृतिक नृत्य, लाइभ ब्यान्ड र गन्धर्व गायन पनि हुनेछ। रेवानका अध्यक्ष वसन्त गौतमले पर्यटन क्षेत्र कठिन अवस्थाबाट गुज्रिरहेका बेला 'नेपाल खुला छ' भन्ने सन्देश दिन महोत्सव गरिएको बताउनुभएको छ। उहाँका अनुसार अविरल वर्षा र विषम परिस्थितिका बीच पनि पोखराका व्यवसायी पर्यटक स्वागत गर्न तयार रहेको सन्देश दिनु आयोजनाको उद्देश्य हो।

यस वर्षको पर्यटन दिवसले डिजिटल एजेन्डा र कृत्रिम बुद्धिमत्तामार्फत पर्यटनको पुनः परिकल्पनालाई विश्वव्यापी मूल नारा बनाएको छ।