कोरियापछि नेपथ्यको अर्को प्रस्तुति दुबईमा

दक्षिण कोरियामा कार्यक्रम सकेको नेपथ्य ब्यान्डले अब संयुक्त अरब इमिरेट्सको दुबईमा साङ्गीतिक प्रस्तुति दिने भएको छ। दुबईको इन्टरनेट सिटीमा रहेको 'दी अजेन्डा' हलमा असोज १८ गते आइतबार कन्सर्ट हुनेछ। यो नेपथ्यको चौथो दुबई भ्रमण हो।

यसअघिका तीनै कन्सर्ट आइस हकी खेलिने 'अल नासेर लिजर ल्यान्ड' मा भएका थिए। यसपटक थप सुविधासहितको नयाँ स्थल रोजिएको आयोजकले जनाएको छ। नेपालयका किरणकृष्ण श्रेष्ठले दसैँको मुखमा दर्शकले सङ्गीतसँगै नेपाली समुदायको जमघटको अनुभव पनि पाउने बताउनुभएको छ।

खाडी मुलुकमध्ये साउदी अरब र कतारपछि सबैभन्दा धेरै नेपाली कामदार यूएईमा छन्। एक अध्ययनले त्यहाँ करिब सात लाख नेपालीको बसोबास देखाएको छ। नेपथ्य पहिलोपटक सन् २०१५ को भूकम्पलगत्तै दुबई पुगेको थियो, जुन कार्यक्रम भूकम्पअघि नै तय भएको थियो।

त्यसबाट उठेको रकम ब्यान्डले प्रधानमन्त्री दैवी प्रकोप उद्धार कोषमा जम्मा गरेको थियो। कोभिड महामारीपछि सन् २०२२ मा ब्यान्डको पहिलो विदेश यात्रा पनि दुबईमै भएको थियो। लोकलयका गीत गाउँदै आएको नेपथ्यलाई त्यहाँका नेपालीले न्यानो साथ दिँदै आएको मुख्य गायक अमृत गुरुङले बताउनुभएको छ।