उदयपुरका तीन पालिकाद्वारा ९३ भूमिहीन परिवारलाई जग्गाधनी पुर्जा

उदयपुरका तीन स्थानीय तहले दुई दिनभित्र ९३ भूमिहीन दलित, सुकुम्बासी तथा अव्यवस्थित बसोबासी परिवारलाई जग्गाधनी प्रमाणपुर्जा हस्तान्तरण गरेका छन्। कटारी नगरपालिका, रौतामाई गाउँपालिका र त्रियुगा नगरपालिकाले बिहीबार र शुक्रबार छुट्टाछुट्टै कार्यक्रम आयोजना गरेका थिए। शुक्रबार कटारी नगरपालिका–१ बेलसोतका १० परिवारले पुर्जा पाएका छन्।

त्यहाँ नगरप्रमुख राजेशचन्द्र श्रेष्ठले पुर्जा हस्तान्तरण गर्नुभएको हो। पुर्जा पाउनेमा तीन भूमिहीन दलित र सात भूमिहीन सुकुम्बासी परिवार छन्। नगरप्रमुख श्रेष्ठले आगामी दिनमा नगरपालिकाका अन्य वडाका भूमिहीनलाई पनि समेट्ने बताउनुभएको छ।

सोही दिन रौतामाई गाउँपालिकाका ५६ परिवारलाई पुर्जा वितरण गरिएको छ, जुन तीन पालिकामध्ये सबैभन्दा धेरै हो। त्यसअघि बिहीबार त्रियुगा नगरपालिका–५ का २७ परिवारलाई पुर्जा दिइएको थियो।