सलमान खानको 'मातृभूमि' मा अनुपविक्रम शाही, नयाँ प्रदर्शन मिति घोषणा

भारतीय अभिनेता सलमान खान र नेपाली अभिनेता अनुपविक्रम शाही अभिनीत युद्धप्रधान फिल्म 'मातृभूमि: मे वार रेस्ट इन पिस' आगामी डिसेम्बर ४ मा प्रदर्शन हुने भएको छ। सलमानले शुक्रबार मुम्बईमा भएको ट्रेलर सार्वजनिक कार्यक्रममा नयाँ मिति घोषणा गर्नुभएको हो। यसअघि 'ब्याटल अफ गलवान' नाम राखिएको फिल्मको नाम यसै वर्ष फेरिएको थियो।

सुरुमा जनवरी वा जुनमा ल्याउने योजना रहेको फिल्म पछि अगस्टमा सारिएको थियो। सलमानका अनुसार भिजुअल इफेक्ट्सको गुणस्तरमा सम्झौता नगर्ने निर्णय र छायांकनमा आएको अवरोधले प्रदर्शन ढिलो भएको हो। निर्देशक अपूर्व लाखियाका अनुसार अनुपविक्रमले फिल्ममा खलनायकको भूमिका निर्वाह गर्नुभएको छ।

विश्वभरका सयौँ कलाकारको अडिसनबाट उहाँ छानिनुभएको लाखियाले बताउनुभएको छ। अनुपविक्रमले चिनियाँ जनमुक्ति सेनाका मेजरको भूमिका गरेको बताइएको छ। सलमानसँग काम गर्नु ठूलो अवसर भएको र अझै नर्भस रहेको अनुपविक्रमले बताउनुभएको छ।

फिल्म सन् २०२० मा पूर्वी लद्दाखको गलवान क्षेत्रमा भारत र चीनका सैनिकबीच भएको भिडन्तबाट प्रेरित छ। सलमानले १६ बिहार रेजिमेन्टका कमान्डिङ अफिसर कर्नेल बिक्कुमल्ला सन्तोष बाबुको भूमिका निभाउनुभएको छ। अभिनेत्री चित्राङ्गदा सिंह पनि फिल्मको प्रमुख भूमिकामा हुनुहुन्छ।

निर्देशकका अनुसार फिल्म युद्ध मात्र नभई मानवता, त्याग र सैनिकको मौन संघर्षको कथा पनि हो। फिल्मको शीर्ष गीतमा अनुपविक्रम छोटो समय देखिनुभएको छ।