बेल्जियममा अवैध आप्रवासीको घरभित्र पसेर पक्राउ गर्न प्रहरीलाई अनुमति

बेल्जियमले निश्चित अवस्थाका अवैध आप्रवासीलाई उनीहरूकै बसोबास स्थलमा पसेर पक्राउ गर्न प्रहरीलाई अधिकार दिने कानुन पारित गरेको छ। शुक्रबार संसद्‌बाट पारित यो व्यवस्था सबै अवैध आप्रवासीमा लागू हुँदैन। देश छाड्ने आदेश पालना नगर्ने तथा सार्वजनिक व्यवस्था वा राष्ट्रिय सुरक्षाका लागि जोखिम मानिएका व्यक्ति मात्र यसको निसानामा छन्।

घर प्रवेश गर्नुअघि प्रहरीले अनुसन्धान न्यायाधीशको अनुमति लिनुपर्नेछ र अध्यागमन कार्यालयका कर्मचारी पनि साथमा हुनुपर्नेछ। यस्तो खानतलासी बिहान ५ बजेदेखि ९ बजेसम्म मात्र गर्न पाइनेछ। अवैध रूपमा बसेका र सुरक्षा जोखिम निम्त्याउन सक्ने व्यक्तिलाई देशबाट निकाल्ने प्रक्रिया प्रभावकारी बनाउन नयाँ कानुन आवश्यक भएको सरकारले जनाएको छ।

यो प्रस्ताव बेल्जियममा वर्षौँदेखि चर्को बहसको विषय बनेको थियो। वामपन्थी दल र मानव अधिकार संस्थाहरूले भने यसले नागरिक स्वतन्त्रता र संविधानको उल्लङ्घन गर्ने भन्दै कडा आलोचना गरेका छन्।