अमेरिकामाथिको निर्भरता घटाउन क्यानाडाको नयाँ बजेट

अमेरिकी राष्ट्रपति डोनाल्ड ट्रम्पको संरक्षणवादी व्यापार नीतिको मार खेपिरहेको क्यानाडाले अमेरिकामाथिको निर्भरता घटाउने लक्ष्यसहित नयाँ बजेट ल्याएको छ। प्रधानमन्त्री मार्क कार्नीको सरकारले बिहीबार प्रस्तुत गरेको बजेटलाई आफ्नो भविष्य आफैँ तय गर्ने योजनाका रूपमा अघि सारिएको छ। प्रधानमन्त्री कार्नीले दुई देशबीचको सम्बन्ध स्थायी रूपमा फेरिइसकेको र ट्रम्प प्रशासनअघिको शुल्कमुक्त व्यापार फर्कने सम्भावना नरहेको बताउनुभएको छ।

अर्थमन्त्री फ्राँस्वा–फिलिप शाम्पेनका अनुसार स्वदेशभित्रको व्यापार बढाउनु र अन्तर्राष्ट्रिय साझेदार विविध बनाउनु बजेटको मुख्य उद्देश्य हो। बजेटले ऊर्जा उत्पादन, महत्त्वपूर्ण खनिज उत्खनन र पूर्वाधार विकासलाई प्राथमिकता दिएको छ। अमेरिकी भन्सार शुल्कले थिचिएका अटोमोबाइल र स्टिल उद्योगका कामदारलाई सहयोग गर्ने योजना पनि बजेटमा समेटिएको छ।

अमेरिकी डेमोक्रेटिक पार्टीका सांसद जेमी रास्किनले आफ्नो पार्टीले क्यानाडामाथिको शुल्क हटाउने र सम्बन्ध सुधार्ने बताउनुभएको छ। तर क्यानाडाका व्यापारमन्त्री डोमिनिक लेब्लाङ्कले शुल्कसम्बन्धी वार्ता अमेरिकी कङ्ग्रेससँग नभई ह्वाइट हाउससँग हुने स्पष्ट पार्नुभएको छ। कार्नी र ट्रम्पले व्यापार सम्झौताको आशा व्यक्त गरे पनि यसअघिका वार्ता अवरुद्ध भएका थिए।

सरकारले बजेट घाटा गत वर्ष अनुमान गरिएको करिब ७८ अर्ब क्यानाडाली डलरभन्दा कम रहने अपेक्षा गरेको छ। यसअघि बजेट पारित गर्न विपक्षीको साथ खोज्नुपर्ने सत्तारूढ लिबरल पार्टीसँग अहिले संसद्मा बहुमत रहेको छ।