बेलायतमा स्थायी बसोबासका लागि १० वर्ष कुर्नुपर्ने, नेपालीमा पनि असर

बेलायत सरकारले स्थायी बसोबासको आवेदनका लागि कुर्नुपर्ने सामान्य अवधि पाँच वर्षबाट बढाएर १० वर्ष पुर्‍याउने घोषणा गरेको छ। सरकारकै आकलनअनुसार नयाँ आप्रवासन नीतिले करिब पाँच लाखभन्दा बढी आप्रवासीलाई असर गर्नेछ। बेलायतमा झन्डै दुई दशकदेखि वकालत गर्दै आउनुभएका कानुन व्यवसायी राजु थापाका अनुसार कामदार भिसामा रहेका नेपाली पनि यसबाट प्रभावित हुनेछन्।

नयाँ व्यवस्थामा करिब ५० हजार पाउन्ड वार्षिक आम्दानी गर्नेले पाँच वर्षमै र करिब सवा १ लाख पाउन्ड कमाउने ग्लोबल ट्यालेन्ट तथा इनोभेटर फाउन्डर भिसावाहकले तीन वर्षमै आवेदन दिन पाउनेछन्। होटल–रेस्टुरेन्ट र केयर क्षेत्रमा काम गर्ने धेरैजसो नेपालीका लागि यो आम्दानी सीमा पुर्‍याउन कठिन हुने थापाले बताउनुभएको छ। सीमा पूरा गर्न नसक्नेले थप पाँच वर्ष भिसा नवीकरण गरेर बस्नुपर्दा आर्थिक भार बढ्ने र रोजगारी निरन्तरतामा समस्या आउन सक्ने उहाँको भनाइ छ।

सोसाइटी अफ नेपाली लयर्स इन युकेका अध्यक्ष दीपक भट्टराईका अनुसार बेलायतमा कार्यरत अधिकांश नेपालीको वार्षिक आम्दानी करिब २५ हजारदेखि ३५ हजार पाउन्डसम्म छ। विद्यार्थी भिसामा पुगेका नेपालीले पनि पढाइपछि कामदार भिसा पाए स्थायी बसोबासका लागि लामो समय पर्खनुपर्ने हुन्छ। नक्कली प्रायोजनपत्र बनाएर कामदार भिसा मिलाइदिने भन्दै करिब १५ देखि २० हजार पाउन्डसम्म लिने ठगी बढेकाले बिचौलियाबाट नभई कम्पनीसँग सिधै सम्पर्क गर्न थापाले सुझाव दिनुभएको छ।