तिहार खर्च जुटाउन राउटे समुदायका सदस्य पाल्पा पुगे

तिहार मनाउन खर्च जुटाउने उद्देश्यले राउटे समुदायका ५ जना सदस्य पाल्पा आइपुगेका छन्। राउटे नेपालका लोपोन्मुख आदिवासी समुदायमध्ये एक हुन् र यो समूह कर्णाली प्रदेशको सुर्खेत जिल्लामा बस्दै आएको छ। सवारी साधनमा पाल्पा पुगेका उनीहरूले तानसेन बजारमा हातैले बनाएका काठका पिर्का, थाल र कचौरा बेचिरहेका छन्।

सामान बेच्नुका साथै उनीहरूले आर्थिक सहयोग पनि सङ्कलन गरिरहेका छन्। समुदायका सदस्य बन्दबीर शाहीका अनुसार पुस्तौँदेखि सिकेको सीप र श्रमले बनाएका काठका सामान बेचेर उनीहरूले दैनिक गुजारा र चाडपर्वको खर्च चलाउँदै आएका छन्। तिहारमा राम्रो खाना खाने इच्छा भए पनि पैसा नभएकाले आफैँ बनाएका भाँडा बेच्दै सहयोग मागेको शाहीले बताउनुभएको छ।