तनहुँ जलविद्युत्‌को दमौली–भरतपुर प्रसारण लाइन निर्माणले गति लियो

तनहुँ जलविद्युत् आयोजनाको दमौली–भरतपुर प्रसारण लाइन निर्माणको करिब ८२ प्रतिशत काम सम्पन्न भएको छ। यो लाइन तनहुँको ऋषिङ गाउँपालिका–१ मा निर्माणाधीन करिब १४० मेगावाट क्षमताको आयोजनाअन्तर्गत बनिरहेको छ। आयोजना प्रमुख श्यामजी भण्डारीका अनुसार करिब ३५ किलोमिटर लामो २२० केभी डबल सर्किट लाइनका लागि करिब ९४ वटा टावर बनाउनुपर्छ।

तीमध्ये करिब ८३ वटाको जग बनिसकेको र झन्डै ८० वटा टावर खडा भइसकेको उहाँले बताउनुभएको छ। चितवन र तनहुँका डिभिजन वन कार्यालयबाट वन क्षेत्र प्रवेश र रुख काट्ने स्वीकृति पाएपछि काममा तीव्रता आएको भण्डारीले जानकारी दिनुभएको छ। हाल टावरको जग बनाउने, टावर ठड्याउने, आवश्यक ठाउँमा टावर संरक्षण गर्ने र तार तान्ने काम भइरहेको छ।

चितवनको भरतपुर महानगरपालिका र तनहुँको देवघाट गाउँपालिका क्षेत्रमा तार तान्ने काम जारी छ। भण्डारीका अनुसार हालसम्म करिब २ किलोमिटर तार तानिसकिएको छ। आयोजनाको तेस्रो चरणअन्तर्गत यो लाइन बनाउने ठेक्का भारतीय कम्पनी केइसी इन्टरनेशनलले पाएको छ।