ओखलढुंगाको ३९५ मिटर लामो झोलुंगे पुल पर्यटकको आकर्षण

ओखलढुंगा सदरमुकाममा बनेको ३९५ मिटर लामो झोलुंगे पुल आन्तरिक तथा बाह्य पर्यटकको आकर्षणको केन्द्र बन्न थालेको छ। सदरमुकामको हुलाकडाँडा र स्रष्टा पार्कलाई जोड्ने यो पुल सिद्धिचरण नगरपालिकाको पहलमा सङ्घीय सरकारको बजेटबाट निर्माण गरिएको हो। सस्पेन्सन ब्रिज डिभिजन कार्यालयले बनाएको यो संरचनाले पर्यटन प्रवर्धनसँगै स्थानीयको आवतजावत पनि सहज बनाएको छ।

स्थानीयका साथै आसपासका जिल्लाबाट आउने पर्यटकका लागि यो पुल प्रमुख आकर्षण बनेको छ। पुल बनेपछि स्रष्टा पार्क र वरपरका अन्य पर्यटकीय संरचना हेर्न जान सजिलो भएको छ। नगरपालिकाले यस क्षेत्रलाई पर्यटकीय हबका रूपमा विकास गरी आन्तरिक तथा बाह्य पर्यटक भित्र्याउने लक्ष्य राखेको छ।