प्रधानमन्त्री शाहको भारत भ्रमण मंसिर ७ मा तय, ऊर्जा एजेन्डा प्राथमिकतामा

प्रधानमन्त्री बालेन्द्र शाह आगामी मंसिर ७ गते भारतको औपचारिक भ्रमणमा जाने तयारी सुरु भएको छ। परराष्ट्र मन्त्रालय सम्बद्ध स्रोतले प्रधानमन्त्री सोही दिन नयाँदिल्ली पुग्ने जनाएको छ, तर दुवै सरकारले मिति र कार्यक्रमको औपचारिक घोषणा गरिसकेका छैनन्। भारतीय सञ्चारमाध्यमले भ्रमण मंसिर ७ देखि ९ गतेसम्म हुने उल्लेख गरेका छन्।

बिमस्टेकको पहिलो गृहमन्त्रीस्तरीय बैठकका लागि भारतमा रहनुभएका गृहमन्त्री सुधन गुरुङले भारतीय समकक्षी अमित शाहसँग भ्रमणबारे छलफल गर्नुभएको छ। मंगलबार बैठक सकिएपछि दुवै मन्त्रीबीच भेटवार्ता भएको थियो। भ्रमणमा ऊर्जा क्षेत्रका एजेन्डालाई प्राथमिकतासाथ उठाइने ऊर्जा मन्त्रालयले जनाएको छ।

मन्त्रालयका अनुसार पश्चिम सेती र सेती नदी–६ जलविद्युत् आयोजनाबारे भारतसँग गम्भीर छलफल हुनेछ। दुवै आयोजनामा भारत सरकारको स्वामित्वमा रहेको कम्पनी एनएचपीसी संलग्न छ। सीमापार बिजुली व्यापारको दायरा बढाउने विषय पनि एजेन्डामा छ।

ऊर्जा मन्त्रालयले परराष्ट्र मन्त्रालय र प्रधानमन्त्री कार्यालयसँग समन्वय गरेर भ्रमणको खाका बनाइरहेको छ। सरकारले निजी क्षेत्रलाई बिजुली व्यापारको इजाजत दिने तयारी पनि अन्तिम चरणमा पुर्‍याएको छ। वर्षायाममा खेर जाने बिजुलीको देशभित्रै खपत बढाउन महसुल प्रणालीमा परिवर्तन गरिने पनि मन्त्रालयले जनाएको छ।