भारतका लागि प्रस्तावित राजदूत पाण्डेको सुनुवाइ: सीमा, इपिजी, व्यापार घाटा र 'नेपो बेबी' प्रश्न

भारतका लागि प्रस्तावित राजदूत डा. निश्चलनाथ पाण्डेले प्रधानमन्त्री बालेन शाह छिट्टै भारत भ्रमणमा जाने तर मिति तय नभएको बताउनुभएको छ। सोमबार सिंहदरबारमा भएको संसदीय सुनुवाइ समितिको बैठकमा कार्ययोजना प्रस्तुत गर्दै उहाँले भारतसँगको व्यापार असन्तुलन घटाउन जलविद्युत् निर्यातलाई प्राथमिकतामा राख्नुपर्ने धारणा राख्नुभएको छ।

सीमामा ड्रोन र प्रविधि प्रयोग गरी चौबीसै घण्टा चल्ने स्मार्ट बोर्डर अवधारणा लागू गर्नुपर्नेमा पनि उहाँले जोड दिनुभएको छ। भेषबहादुर थापा सन् २००३ मा फर्केयता दिल्लीमा कुनै पनि नेपाली राजदूतले कार्यकाल पूरा गर्न नसकेको उहाँले औँल्याउनुभएको छ। सुनुवाइमा सत्तारुढ रास्वपाका सांसद राजीव खत्रीले पूर्वमन्त्रीका छोरा भएकै कारण सिफारिस पाएको हो कि योग्यताका आधारमा भन्दै 'नेपो बेबी' सम्बन्धी प्रश्न गर्नुभएको छ।

रास्वपाकै मधुकुमार चौलागाईंले नेपालमा अड्किएका प्रतिबन्धित भारतीय नोट सटहीको विषय उठाउनुभएको छ। एमाले सांसद प्रेम दङ्गालले सन् १९५० को सन्धि पुनरावलोकन, प्रबुद्ध व्यक्ति समूह अर्थात् इपिजीको प्रतिवेदन र सीमामा बनेका बाँधका कारण तराईमा हुने डुबानको विषय उठाउनुभएको छ। कांग्रेस सांसद आनन्दप्रसाद ढुंगानाले नेपालले पनि भारतीय भूमि मिचेको भन्ने प्रधानमन्त्रीको अभिव्यक्ति र सुस्ता विवादबारे राजदूतको धारणा खोज्नुभएको छ।

पाण्डेले नेपालको कूटनीति कहिल्यै असफल नभएको दाबी गर्दै नयाँ दिल्लीस्थित दूतावासको कार्यशैली सुधार्ने प्रतिबद्धता जनाउनुभएको छ।