चीनका लागि प्रस्तावित राजदूत शर्माको सुनुवाइ: व्यापार घाटा, सीमा नाका र आर्थिक कूटनीतिमा जोड

चीनका लागि प्रस्तावित राजदूत डा. कल्याणराज शर्माले नेपाली वस्तु नेपालमै बनाएर र नेपालमै ब्रान्डिङ गरेर चिनियाँ बजारमा बेच्ने रणनीति अघि सार्नुभएको छ। सोमबार संसदीय सुनुवाइ समितिमा कार्ययोजना पेस गर्दै उहाँले राजनीतिक विश्वास जोगाउँदै नागरिक र सरकारलाई व्यावहारिक लाभ दिलाउने आफ्नो मुख्य लक्ष्य रहेको बताउनुभएको छ।

उहाँले एक चीन नीति, पञ्चशील र असंलग्नताप्रति नेपालको प्रतिबद्धता दोहोर्‍याउनुभएको छ। कार्ययोजनाअनुसार अरनिको राजमार्ग, रसुवागढी पुल, काठमाडौँ चक्रपथ, किमाथाङ्का सडक, स्याफ्रुबेँसी–रसुवागढी सडक तथा केरुङ–रसुवागढी–चिलिमे प्रसारण लाइनलाई उहाँले विशेष प्राथमिकतामा राख्नुभएको छ। पारवहन सम्झौताअन्तर्गत नेपालले पाएका चिनियाँ समुद्री र सुख्खा बन्दरगाहको अधिकतम उपयोग गर्ने र परम्परागत सीमा व्यापार बिन्दु नियमित सञ्चालन गर्ने योजना पनि उहाँले सुनाउनुभएको छ।

ल्हासास्थित महावाणिज्य दूतावासलाई कैलाश मानसरोवर तीर्थयात्रा, सीमा व्यापार र नेपालीको सहायताको केन्द्र बनाउने उहाँको भनाइ छ। सुनुवाइमा रास्वपा सांसद मधुकुमार चौलागाईंले उहाँको प्राथमिकता चीनको चाहना हुन्छ कि नेपालको स्वार्थ भनेर प्रश्न गर्नुभएको छ। अन्य सांसदहरूले व्यापार घाटा घटाउने उपाय, तातोपानी नाकाको विकल्प र बीआरआई लगानीको ढाँचाबारे प्रश्न गरेका छन्।

सांसद पद्मा अर्यालले चिनियाँ लगानीका पोखरा र भैरहवा विमानस्थल चलाउन राजदूतको भूमिकाबारे सोध्दै चीन लगानी गर्न तत्पर भए पनि नेपालले उपयोग गर्न नसकेको बताउनुभएको छ। उहाँले विवाहका नाममा चीनमा अलपत्र परेका नेपाली महिलाको समस्या गम्भीरतापूर्वक सुल्झाउन पनि आग्रह गर्नुभएको छ।