अर्नब: सबै सरकारी निकायलाई तयारी अवस्थामा रहन निर्देशन, मुख्य राजमार्ग प्रभावित हुन सक्ने

चक्रवात ‘अर्नब’को सम्भावित असरलाई ध्यानमा राखेर सरकारले मातहतका सबै निकायलाई उच्च सतर्कतासहित तयारी अवस्थामा रहन निर्देशन दिएको छ। प्रधानमन्त्री तथा मन्त्रिपरिषद्को कार्यालयले बिहीबार जारी गरेको सूचनाअनुसार चक्रवातका कारण वर्षा, हिमपात र केही स्थानमा हावाहुरीको सम्भावना छ। चक्रवात नेपाल आइपुग्दासम्म कमजोर हुने अनुमान गरिएको छ।

जल तथा मौसम विज्ञान विभागका अनुसार भोलि कोशी, बागमती र गण्डकी प्रदेशका हिमाली र पहाडी भू-भागका एक-दुई स्थानमा भारी वर्षा वा हिमपात हुन सक्छ। मधेश प्रदेश तथा लुम्बिनी र गण्डकीका पहाडी र तराई भू-भागका एक-दुई स्थानमा पनि भारी वर्षाको सम्भावना छ। कोशी, मधेश, बागमती, गण्डकी र लुम्बिनीका केही स्थानमा मेघगर्जन र चट्याङसहित वर्षा हुन सक्ने विभागले जनाएको छ।

बाढी पूर्वानुमान महाशाखा र भौगर्भिक तथा जल उत्पन्न विपद् अनुसन्धान शाखाले पूर्वसूचना जारी गरेका छन्। उनीहरूका अनुसार नारायणी, बागमती र कोशी जलाधारमा पर्ने वर्षाले राजमार्गमा पहिरोको जोखिम बढाउन सक्छ। पहाडी र भिरालो सडकखण्डमा पहिरो, ढुङ्गा खस्ने र सडक भासिने खतरा छ।

नदी किनारका खण्डमा बाढी र कटानको जोखिम सूचनामा औँल्याइएको छ। पर्यटन विभाग, नेपाल नागरिक उड्डयन प्राधिकरण र जिल्ला प्रशासन कार्यालयले पर्यटक, पर्वतारोही, यात्रु र सर्वसाधारणलाई सचेत रहन आग्रह गरेका छन्। मौसमको पूर्वसूचनापछि मुस्ताङबाट फर्किने पर्यटक बढेका छन्।

घाँसा चेकपोस्टबाट बुधबार करिब २ हजार ८०० पर्यटक भित्रिए र करिब ३ हजार ३०० बाहिरिए, जिल्ला प्रहरी कार्यालय मुस्ताङले जनाएको छ।