विपद्ले ढिलो भएको सवारी दर्तामा सहजीकरण माग्दै नाइमाको यातायात विभागलाई पत्र

नाइमाले विपद्का कारण समयमै दर्ता हुन नसकेका सवारीसाधनका विषयमा सहजीकरण माग्दै यातायात व्यवस्था विभागलाई पत्र लेखेको छ। प्रचलित व्यवस्थाअनुसार भन्सार जाँचपास भएको १५ दिनभित्र सवारीसाधन सम्बन्धित यातायात कार्यालयमा दर्ता गरिसक्नुपर्छ। तर मुस्ताङको जोमसोम र म्याग्दीको बेनी क्षेत्रमा आएको बाढी तथा प्राकृतिक विपद्ले यो समयसीमा पालना गर्न अवरोध पुर्‍याएको नाइमाले जनाएको छ।

मुस्ताङको कोरला नाकाबाट भन्सार जाँचपास भइसकेका सवारीसाधन विपद्का कारण यातायात कार्यालयसम्म समयमै पुग्न सकेका छैनन्। यसले गर्दा व्यवसायीहरू तोकिएको अवधिभित्र दर्ता प्रक्रिया पूरा गर्न नसक्ने अवस्थामा पुगेका छन्। विपद्को विशेष परिस्थितिलाई ध्यानमा राखेर दर्ताको म्याद थप गरिदिन नाइमाले विभागसँग आग्रह गरेको छ।

ढिलाइका कारण व्यवसायीमाथि अनावश्यक प्रशासनिक र आर्थिक भार नपर्ने गरी सहजीकरण गर्न पनि पत्रमा माग गरिएको छ।