औद्योगिक व्यवसाय विकास प्रतिष्ठानबाट गत वर्ष ९२२ स्टार्टअप छनोट

औद्योगिक व्यवसाय विकास प्रतिष्ठानले गत आर्थिक वर्ष २०८२/८३ मा ९२२ स्टार्टअप परियोजनालाई कर्जा उपलब्ध गराएको जनाएको छ। प्रतिष्ठानका अनुसार ती परियोजनामा १ अर्ब ५ करोड रुपैयाँभन्दा बढी कर्जा प्रवाह भएको छ। नयाँ सोच, प्रविधि र नवप्रवर्तनमा आधारित व्यवसायलाई वित्तीय पहुँच दिन स्टार्टअप उद्यम कर्जा कार्यक्रम सञ्चालन गरिएको हो।

उद्योग, वाणिज्य तथा आपूर्ति मन्त्रालयअन्तर्गतको प्रतिष्ठानले २०८२ कात्तिक १९ देखि मंसिर ९ सम्म २१ दिन प्रस्ताव माग गरेको थियो। सो अवधिमा देशभरबाट १० हजार २४४ प्रस्ताव दर्ता भएका थिए। तीमध्ये ८ हजार २०३ अनलाइनबाट र २ हजार ४१ कार्यालयमै पुगेर बुझाइएका थिए।

प्राविधिक र प्रशासनिक जाँचपछि १ हजार २९८ परियोजना प्रारम्भिक सूचीमा परेका थिए। ती उद्यमीले २०८३ जेठ ३१ देखि असार ५ सम्म आफ्नो व्यवसाय योजना प्रत्यक्ष प्रस्तुत गरेका थिए। मूल्याङ्कनपछि ९६६ परियोजना कर्जाका लागि सिफारिस भई असार १६ मा राष्ट्रिय वाणिज्य बैंकमा पठाइएका थिए।

बैंकको प्रक्रिया पूरा गरेपछि ९२२ परियोजनाले कर्जा पाएका छन्। सरकारले गत वर्ष प्रतिष्ठानलाई करिब १ अर्ब ४६ करोड रुपैयाँ बजेट दिएको थियो, जसको अधिकांश भाग चालू खर्चतर्फ थियो। प्रतिष्ठानले बजेट मुख्य रूपमा स्टार्टअप कर्जा, प्रविधि स्तरोन्नति अनुदान, उद्यमशीलता तालिम र व्यवसाय संवर्द्धन सेवामा खर्च गरेको जनाएको छ।