जुम्लाको स्याउलाई बजार दिलाउन आयात रोक्न सांसद शाहीको आग्रह

राप्रपा संसदीय दलका नेता तथा सांसद ज्ञानेन्द्र शाहीले कर्णाली प्रदेशको जुम्लामा उत्पादित स्याउ बजारमा रहुन्जेल विदेशबाट हुने स्याउ आयात रोक्न सरकारसँग आग्रह गर्नुभएको छ। असोज १७ गते फेसबुकमा लेखेको सन्देशमा उहाँले रास्वपा सभापति रवि लामिछानेलाई सम्बोधन गर्दै यो माग राख्नुभएको हो। रास्वपाले आफ्नो केन्द्रीय समिति बैठकको सुरुमै सहभागीहरूलाई जुम्लाको स्याउ बाँडेको थियो।

स्थानीय उत्पादनको प्रचारमा सघाएको भन्दै शाहीले सभापति लामिछानेलाई 'धेरै–धेरै धन्यवाद' दिनुभएको छ। तर जुम्लाको स्याउ अहिले बजारमा आइसके पनि त्यहाँका किसानले उत्पादनको उचित मूल्य पाउन नसकेको उहाँको भनाइ छ। सरकारको नेतृत्व रास्वपाकै हातमा रहेको उहाँले उल्लेख गर्नुभएको छ।

कृषि मन्त्रालय र कृषिमन्त्री पनि रास्वपाकै भएको भन्दै उहाँले किसानको मूल्य समस्यामा ध्यान दिन माग गर्नुभएको छ। जुम्लाको स्याउ बजारमा रहेसम्म विदेशी स्याउ रोकिदिन उहाँले सभापति लामिछानेसँग अनुरोध गर्नुभएको छ। यो माग पूरा भए जुम्लेली किसानले लामिछानेको गुन कहिल्यै नबिर्सने उहाँले बताउनुभएको छ।

स्वदेशी उत्पादनलाई प्राथमिकता दिनुपर्ने भन्दै उहाँले जुम्लाका किसानको उत्पादनले उचित बजार पाउने वातावरण बनाउन सरकारको ध्यानाकर्षण गराउनुभएको छ।