दसैँका १३ दिनमा उपत्यकामा मापसे र लापसे गरी सवारी चलाउने ९८२ चालक कारबाहीमा

काठमाडौँ उपत्यकामा मादक पदार्थ तथा लागू पदार्थ सेवन गरी सवारीसाधन चलाउने ९८२ जना चालक कारबाहीमा परेका छन्। काठमाडौँ उपत्यका ट्राफिक प्रहरी कार्यालयले यो जानकारी दिएको हो।

ट्राफिक प्रहरीका अनुसार घटस्थापनादेखि १३ दिनको अवधिमा यति सङ्ख्यामा चालक कारबाहीमा परेका हुन्। यो अवधि बडादसैँको समयसँग मेल खान्छ। चाडपर्वका बेला सडकमा सवारी र यात्रुको चाप बढ्ने भएकाले प्रहरीले उपत्यकाका विभिन्न स्थानमा जाँच गरेको थियो।

मादक पदार्थ सेवन गरी सवारी चलाउनेलाई मापसे र लागू पदार्थ सेवन गरी सवारी चलाउनेलाई लापसे भनिन्छ। प्रहरीले मापसे र लापसेविरुद्धको कारबाही दसैँभर जारी राखेको थियो।

दसैँ मनाएर काठमाडौँ फर्किनेहरूको सङ्ख्या बढिरहेका बेला ट्राफिक प्रहरीले यो तथ्याङ्क सार्वजनिक गरेको हो।