दसैँ लक्षित सडक खाना महोत्सव भैरहवा र विराटनगरमा

दसैँलाई लक्षित गर्दै भैरहवा र विराटनगरमा सडक खाना महोत्सव आयोजना हुने भएका छन्। चेम्बर अफ कमर्स रुपन्देहीले घटस्थापनाको पूर्वसन्ध्यामा असोज २४ र २५ गते भैरहवामा 'सिद्धार्थ सडक खाना महोत्सव–२०८३' गर्ने जनाएको छ। बसपार्कदेखि देवकोटा चोकसम्मको सडकमा साँझ ५ बजेदेखि राति १२ बजेसम्म महोत्सव चल्नेछ।

आयोजकका अनुसार करिब १ सय स्टल रहनेछन् र ५० हजारभन्दा बढी सहभागी हुने अपेक्षा छ। महोत्सवमा तारे होटलदेखि विभिन्न जातजातिका परम्परागत परिकार उपलब्ध हुनेछन्। चेम्बरका अध्यक्ष सचिन रोकाले स्थानीय उत्पादक, किसान, महिला तथा युवा उद्यमीलाई सिधै बजारसँग जोड्न महोत्सव गर्न लागिएको बताउनुभएको छ।

गायक दुर्गेश थापा र भोजपुरी कलाकार प्रीति पासवानको प्रस्तुति पनि हुनेछ। संयोजक विनोद खरेलका अनुसार बेलहिया नाका हुँदै आउने पर्यटकको बसाइ लम्ब्याउनु महोत्सवको अर्को लक्ष्य हो। यता विराटनगरमा मञ्जिना मुभिज क्रिएसनले असोज २५ देखि ३० गतेसम्म छैटौँ सडक तथा खाना महोत्सव गर्ने भएको छ।

हिमालय रोडदेखि ट्राफिक चौकसम्म ३० भन्दा बढी परिकारका स्टल रहने क्रिएसनका निर्देशक जतिन ताम्राकारले बताउनुभएको छ। महोत्सव दिउँसो ३ बजेदेखि राति ९ बजेसम्म चल्नेछ। उक्त सडकको यातायात दिउँसो २ बजेदेखि वैकल्पिक मार्गमा मोडिनेछ।