बूढीगण्डकीमा बाढीको कारण हिमपहिरो, गोरखामा ठूलो वर्षा नभएको मौसम निकायको भनाइ

गोरखाको बूढीगण्डकी नदीमा आइतबार आएको भीषण बाढी हिमपहिरोका कारण आएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। प्राधिकरणका अनुसार लोक्पा र उत्तरी क्षेत्रबाट हिमपहिरो आएपछि नदीमा बाढी आएको हो।

आइतबार बिहान चुमनुब्री गाउँपालिका–६ को लोक्पा र चुम्लिङबीचको सिरिङ्गे हिमालमा हिमपहिरो गएको थियो। त्यसपछि त्यहाँबाट बग्ने बूढीगण्डकी नदीमा ठूलो बाढी आयो।

मौसम पूर्वानुमान महाशाखाका अनुसार गोरखा जिल्लामा पछिल्लो २४ घण्टामा हल्का वर्षा मात्र भएको देखिएको छ। बूढीगण्डकीको उपल्लो क्षेत्रमा बाढी आउने खालको पानी परेको रेकर्ड नभएकाले विज्ञहरूले हिमपहिरोको आशंका गरेका छन्। मौसम विभागको प्रारम्भिक निष्कर्षअनुसार यो बाढी वर्षाले मात्र नभई पहिरोले खोला थुनिँदा (ड्यामिङ) बनेको विपद् पनि हुन सक्छ।

बाढीमा पानीसँगै गेग्रानसमेत मिसिएको पाइएको छ। भदौ १० गते भोटेकोशीमा भीषण बाढी आएको थियो। त्यसको ४७ दिनपछि बूढीगण्डकीमा यो बाढी आएको हो। दुई बाढीका उद्गमस्थलबीचको आकाशीय दूरी बढीमा ७० किलोमिटर छ।