नेकपाको दुई महिने 'राष्ट्रिय जागरण अभियान' सुरु, एमालेसँग पार्टी एकता नगर्ने

नेपाली कम्युनिस्ट पार्टी (नेकपा) ले शनिबार कात्तिक ७ गतेदेखि दुई महिने 'राष्ट्रिय जागरण अभियान' सुरु गरेको छ। मंसिर २५ गतेसम्म चल्ने अभियानको शुभारम्भ नेकपाका संयोजक पुष्पकमल दाहाल र सहसंयोजक माधवकुमार नेपालले पार्टी केन्द्रीय कार्यालय पेरिसडाँडामा गरेका हुन्। अभियानमा केन्द्रदेखि स्थानीय तहसम्मका नेता कार्यकर्ता परिचालन गरिने र नेताहरू जनताको गुनासो सुन्न गाउँ–टोल पुग्ने पार्टीले जनाएको छ।

राष्ट्रिय स्वाधीनताको रक्षा, लोकतन्त्र र जनअधिकारको संरक्षण, पार्टी रूपान्तरण तथा समाजवाद निर्माणको आधार तयार पार्ने उद्देश्यले अभियान सञ्चालन गरिएको हो। स्थानीय र प्रदेश चुनावलाई केन्द्रमा राखेर अभियान थालिएको छ। जनतासँगको सम्बन्ध कमजोर हुँदै गएको र पार्टीभित्र नेतामुखी तथा केन्द्रमुखी प्रवृत्ति बढेको पार्टीको अपिलमा स्वीकार गरिएको छ।

कार्यक्रममा संयोजक दाहालले एमालेसँग राष्ट्रिय मुद्दामा सहकार्य सम्भव भए पनि पार्टी एकता नहुने बताए। उनले विश्व राजनीति संक्रमणकालीन अवस्थाबाट गुज्रिरहेको र दोस्रो विश्वयुद्धपछिको व्यवस्था भत्किँदै गए पनि नयाँ बनिनसकेको टिप्पणी गरे।

सहसंयोजक नेपालले पुराना दलले केही नगरेको भाष्यलाई तथ्यका आधारमा चिर्ने बताउँदै २०४७ सालदेखि वामपन्थी तथा कम्युनिस्ट नेतृत्वका सरकारले गरेका कामको विस्तृत विवरण सार्वजनिक गर्ने घोषणा गरे। यसैबीच नेता वर्षमान पुनले गृहजिल्ला रोल्पामा अभियानका क्रममा सरकारले राष्ट्रियता, जनजीविका, सुशासन र सेवा प्रवाहमा कमजोरी गरेको आरोप लगाएका छन्।