जानकी आँखा अस्पताल ६ महिनाभित्र सुधार्ने सांसद मनिष झाको प्रतिबद्धता

राष्ट्रिय स्वतन्त्र पार्टीका सांसद मनिष झाले जनकपुरधामस्थित श्री जानकी आँखा अस्पताललाई ६ महिनाभित्र सुधारेर व्यवस्थित बनाउने प्रतिबद्धता जनाउनुभएको छ। अस्पतालको निरीक्षणका क्रममा उहाँले भौतिक संरचना, जनशक्ति व्यवस्थापन र आर्थिक सुशासनमा ६ महिनाभित्रै देखिने परिवर्तन ल्याउने बताउनुभएको हो। जनकपुरधामको पहिचानसँग जोडिएको यो अस्पतालमा पर्याप्त संरचना र आर्थिक स्रोत भए पनि त्यसको प्रभावकारी उपयोग हुन नसकेको उहाँको भनाइ छ।

सांसद झाका अनुसार अस्पतालको कोषमा करिब २२ करोड रुपैयाँ छ, जसलाई पूर्वाधार स्तरोन्नति र सेवा विस्तारमा लगाइने उहाँले बताउनुभएको छ। अस्पतालको कमजोर व्यवस्थापन र कर्मचारीको कार्यशैली सुधार्नुपर्ने उहाँको धारणा छ। सुधारमा असहयोग गर्ने, काम नगरी तलब बुझ्ने वा अस्पतालको जिम्मेवारीमा रहँदै अन्यत्र निजी व्यवसाय चलाउने कर्मचारीलाई कारबाही गरिने उहाँले चेतावनी दिनुभएको छ।