पीएमजीओ फाइनलको पहिलो दिन नेपाली टोली होरा ईस्पोर्ट्स शीर्षमा

पब्जी मोबाइल ग्लोबल ओपन अर्थात् पीएमजीओ फाइनलको पहिलो दिनपछि नेपाली टोली होरा ईस्पोर्ट्स शीर्ष स्थानमा रहेको छ। होराले पहिलो दिनका ६ खेलमा एउटा चिकेन डिनरसहित ५७ अंक जोडेको छ। चिकेन डिनर भनेको एउटा खेलमा अन्तिमसम्म टिकेर पहिलो हुनु हो।

दोस्रो स्थानमा रहेको यूएलएफको ५३ अंक छ भने अल्टर इगोले ४८ अंक जोडेको छ। एकेजी ४४ अंकसहित चौथो र मङ्गोल्ज ४१ अंकसहित पाँचौँ स्थानमा छन्। होरा र यूएलएफबीच पहिलो दिनपछि ४ अंकको अन्तर छ।

प्रतियोगिताको अन्तिम दिन आइतबार बाँकी ६ खेल हुने छन्, आवश्यक परे सातौँ खेल पनि थपिने छ। होराको ५७ अंकसँगै स्म्याश नियम लागू हुन चाहिने सीमा ६७ अंक पुगेको छ। अन्तिम दिन कुनै टोलीले यो सीमा पार गरेपछिको कुनै खेलमा चिकेन डिनर जितेमा त्यही टोली विजेता बन्ने छ।