पेन्सनको सुनिश्चितता माग्दै मड्रिडमा करिब अढाई लाखको प्रदर्शन

स्पेनको राजधानी मड्रिडमा शनिबार राज्यको पेन्सन प्रणाली जोगाउन माग गर्दै ठूलो प्रदर्शन भएको छ। मड्रिडका अधिकारीले एएफपीलाई दिएको जानकारीअनुसार प्रदर्शनमा करिब २ लाख ५० हजार मानिस सहभागी थिए। प्रदर्शनकारीले आतोचा रेल स्टेसनदेखि मुख्य व्यापारिक सडक ग्रान भियासम्म शान्तिपूर्ण पैदल र्याली निकालेका थिए।

धेरैजसोले पेन्सनको रक्षा र सुनिश्चितताको माग लेखिएका ब्यानर बोकेका थिए। अर्को महिना हुने संसदीय निर्वाचनमा पेन्सनको दिगोपन र बढ्दो जीवनयापन खर्च प्रमुख मुद्दा बनेको छ। समाजवादी प्रधानमन्त्री पेद्रो सान्चेजले दक्षिणपन्थी विपक्षीले मुद्रास्फीतिसँग जोडिएको पेन्सन वृद्धि कमजोर पार्न खोजेको आरोप लगाउनुभएको छ।

दक्षिणी सहर सेभिलका ३८ वर्षीय सरकारी कर्मचारी जुआन फर्नान्डेजले भविष्यमा पेन्सन पाइने कुरामा अनिश्चितता रहेको बताएका छन्।