प्रिमियर लिग: भिल्लाले सिटीको लगातार जितको यात्रा रोक्यो, आर्सनल अंकमा बराबर

इंग्लिस प्रिमियर लिगमा एस्टन भिल्लाले म्यानचेस्टर सिटीलाई २–१ गोलले हराएर उसको लगातार सात जितको सिलसिला तोडेको छ। भिल्ला पार्कमा शनिबार भएको खेलमा भिल्लाका दुवै गोल निकोलस ज्याक्सनले गरेका छन्। छैटौँ मिनेटमा सिटीका डिफेन्डर मार्क गेहीको कमजोर बल नियन्त्रणपछि कप्तान जोन म्याकगिनको पासमा ज्याक्सनले भिल्लालाई अग्रता दिलाएका थिए।

५२औँ मिनेटमा एर्लिङ हालान्डले इलिमान न्डियाएको क्रसमा हेडर गर्दै खेल बराबरीमा ल्याएका थिए। आठ मिनेटपछि वैकल्पिक खेलाडी इब्राहिम एम्बायेको पासमा ज्याक्सनले दोस्रो गोल गर्दै भिल्लालाई फेरि अघि पारेका थिए। भिल्लाले सिटीविरुद्ध पछिल्ला सात भेटमा पाँचौँ र आफ्नै मैदानमा लगातार चौथो जित निकालेको छ।

यो जितसँगै भिल्ला लिग तालिकाको शीर्ष १० भित्र पुगेको छ। सिटीले भने यस सिजनको आठौँ खेलमा पहिलो हार बेहोरेको छ। उता, आर्सनलले घरेलु मैदानमा एभर्टनलाई २–० गोलले हराएको छ।

गाब्रिएलले प्रिमियर लिगको आफ्नो २००औँ खेलमा गोल गरेका छन्। अब दुवै टोली समान अंकमा छन्, तर गोल अन्तरका आधारमा सिटी शीर्षमा र आर्सनल दोस्रो स्थानमा छ।