साउनदेखि ४ सचिवसहित ४६४ सरकारी कर्मचारीको राजीनामा

चालु आर्थिक वर्ष सुरु भएको साउन १ गतेयता ४ सचिवसहित ४ सय ६४ निजामती कर्मचारीले सरकारी सेवाबाट राजीनामा दिएका छन्। यो विवरण करिब तीन महिनाको हो। राष्ट्रिय किताबखाना (निजामती) का निर्देशक तथा सूचना अधिकारी सुदन ख्वाखली श्रेष्ठका अनुसार यसमा २ सय ७ जना राजपत्राङ्कित र २ सय ५७ जना राजपत्र अनङ्कित कर्मचारी छन्।

राजपत्राङ्कित तहमा ४ सचिवबाहेक ३३ सहसचिव, ७२ उपसचिव र ९८ शाखा अधिकृतले पद छाडेका छन्। यसरी उपसचिव र त्यसभन्दा माथिका १ सय ९ जनाले सेवा छाडेका छन्। अनङ्कित तहमा सबैभन्दा धेरै १ सय ३७ जना खरदार र नायब सुब्बा छन् भने श्रेणीविहीन कर्मचारी १ सय २० जना छन्।

सरकारले यी सबै राजीनामा स्वीकृत गरिसकेको छ। निजामती कर्मचारी विधेयकमा ३० वर्ष सेवा पूरा गरेका वा ५५ वर्ष उमेर पुगेकाले पद छाड्नुपर्ने प्रावधान राखिएपछि यसरी राजीनामा दिइएको हो।