एनओसी विवादमा पीसीबीले क्यानसँग पैसा माग्यो, चितवनले पाकिस्तानी खेलाएन

पाकिस्तान क्रिकेट बोर्डले अनापत्ति पत्र अर्थात् एनओसी नदिएपछि नेपाल प्रिमियर लिगमा पाकिस्तानी खेलाडीको सहभागिता अन्योलमा परेको छ। बोर्डले नेपाल क्रिकेट संघलाई इमेल पठाएर ४८ घण्टाभित्र प्रत्येक एनओसीबापत २५ हजार अमेरिकी डलर माग गरेको छ। यो माग प्रतियोगिता सुरु हुने पूर्वसन्ध्यामा आएको हो।

संघका अध्यक्ष चतुरबहादुर चन्दले यो विषयमा अन्तर्राष्ट्रिय क्रिकेट परिषद्मा छलफल भइरहेको बताउनुभएको छ। उहाँले फ्रेन्चाइजले लगानी गरिसकेपछि र खेलाडी नेपाल आइसकेपछि आएको यो व्यवहार गम्भीर भएको बताउनुभएको छ। अध्यक्ष चन्दका अनुसार अब फ्रेन्चाइज टोलीले पाकिस्तानी खेलाडीमा कसरी लगानी गर्ने भन्ने प्रश्न उठेको छ।

विभिन्न फ्रेन्चाइजमा ८ जना पाकिस्तानी खेलाडी अनुबन्धित छन्। कर्णाली याक्सले साहिब्जादा फरहान र हुसेन तलातलाई टोलीमा लिएको छ। चितवन राइनोजले अनुबन्ध गरेका हसन अली, उसामा मीर र मोहम्मद नवाज एनओसी नपाएपछि खेल्न पाएका छैनन्।

त्यसपछि टोलीले हतारमा इङ्ल्यान्डका डेभिड मलान, डान मौस्ली र टम टेलरलाई भित्र्याएको छ। विराटनगर किङ्सविरुद्धको पहिलो खेलमा चितवनले कप्तान रवि बोपारासहित चारै विदेशी स्थानमा इङ्ल्यान्डका खेलाडी उतारेको छ। बोपारा पहिल्यै नेपाल आइसकेका थिए भने अरू तीन जना रातारात आइपुगेका छन्।