चक्रवात अर्नबको प्रभाव: श्रीलंकाभर विद्यालय बन्द

बङ्गालको खाडीमा सक्रिय चक्रवाती आँधी ‘अर्नब’ को अप्रत्यक्ष असरले भारी वर्षा भएपछि श्रीलङ्का सरकारले देशभरका सबै विद्यालय बन्द गरेको छ। चिनियाँ समाचार संस्था सिन्ह्वाका अनुसार श्रीलङ्काको शिक्षा मन्त्रालयले मंगलबार यो निर्णय सार्वजनिक गरेको हो। मन्त्रालयले मौसमको अहिलेको अवस्था हेरेर विद्यार्थी र विद्यालय कर्मचारीको सुरक्षाका लागि विद्यालय बन्द गरिएको जनाएको छ।

देशभर पठनपाठन बन्द भए पनि राष्ट्रिय परीक्षाको एउटा भाग भने तालिकाअनुसार अघि बढ्नेछ। सामान्य शिक्षा प्रमाणपत्र साधारण स्तर परीक्षाअन्तर्गत सौन्दर्यसम्बन्धी विषयको प्रयोगात्मक परीक्षा पहिले नै तोकिएको कार्यक्रमअनुसार हुने मन्त्रालयले स्पष्ट पारेको छ। पछिल्ला केही दिनदेखि आँधीको अप्रत्यक्ष प्रभावले श्रीलङ्काका विभिन्न भागमा भारी पानी परिरहेको छ।

लगातारको वर्षाले बाढी र पहिरोको जोखिम बढाएको छ। जोखिम बढेपछि देशका धेरै क्षेत्रमा बासिन्दालाई सतर्क रहन चेतावनी जारी गरिएको छ।