इजरायलमा मतदान जारी, नेतन्याहुका लागि कडा परीक्षा

इजरायलमा संसद्का १२० सिटका लागि मंगलबार मतदान भइरहेको छ। यो निर्वाचनलाई प्रधानमन्त्री बेन्जामिन नेतन्याहुका लागि कडा परीक्षाका रूपमा हेरिएको छ। मतदान केन्द्र खुलेसँगै विभिन्न उमेरका मतदाताले राजनीतिक नेतृत्व, आर्थिक चुनौती, जारी युद्ध र शान्तिको आवश्यकतालाई मुख्य विषय बताएका छन्।

समाचार संस्था एएनआईसँग जेरुसेलममा कुरा गर्ने एक युवा मतदाताले नेतन्याहुको विपक्षमा मत दिने बताउँदै लोकतन्त्र र सामाजिक एकताप्रति चिन्ता जनाएका छन्। अर्का मतदाताले भने देशको शान्तिपूर्ण भविष्यको आशा व्यक्त गरेका छन्। अमेरिकी राष्ट्रपति डोनाल्ड ट्रम्पले नेतन्याहुको चुनावी अभियानलाई समर्थन गर्नुभएको छ।

बीबीसीका अनुसार अभियानका क्रममा नेतन्याहुले इरानमाथि फेरि आक्रमणको सम्भावनाबारे चर्चा गर्नुभएको थियो र ट्रम्पको समर्थनले त्यस अड्कललाई थप बल दिएको छ। अमेरिकामा पनि एक हप्तापछि मध्यावधि निर्वाचन हुँदैछ, जहाँ महँगी मुख्य चुनावी मुद्दा बनेको छ। विश्लेषकहरूका अनुसार इजरायलको मत परिणामले त्यहाँको भावी सरकार, इरानसँगको द्वन्द्व र मध्यपूर्वको भविष्यमा असर पार्न सक्छ।

अमेरिकी कङ्ग्रेसको बनोटमा आउने परिवर्तनले युद्धको दिशासँगै विश्व अर्थतन्त्रलाई पनि प्रभावित गर्न सक्ने विश्लेषण गरिएको छ।