१९औँ गोदावरी फूल प्रदर्शनी कात्तिक १२ देखि जावलाखेलमा

फ्लोरिकल्चर एसोसिएसन नेपालले तिहार र छठलाई लक्ष्य गरेर कात्तिक १२ गतेदेखि १६ गतेसम्म ललितपुरको जावलाखेल खेल मैदानमा १९औँ गोदावरी फूल प्रदर्शनी गर्ने भएको छ। एसोसिएसनले मंगलबार काठमाडौँमा पत्रकार सम्मेलन गरी यसबारे जानकारी दिएको हो। प्रदर्शनीमा ७८ व्यावसायिक स्टलसहित कुल ८६ स्टल रहनेछन् र ४५० भन्दा बढी प्रकारका फूल तथा बिरुवा हेर्न र किन्न पाइनेछ।

बाँकी स्टलमा ४ आधिकारिक, २ प्रतियोगितात्मक, १ प्लान्ट क्लिनिक र १ फोटो सेल्फी स्टल हुनेछन्। एसोसिएसनका उपाध्यक्ष एवं मेला संयोजक सुमन महर्जनका अनुसार मिनियचर, स्पाइडर, रिफ्लेक्स, इन्कर्भ र कट फ्लावर गरी पाँच विधामा नर्सरी र फर्मबीच प्रतिस्पर्धा हुनेछ। यस वर्ष कट फ्लावरमा उत्कृष्ट पुष्प सजावट विधा नयाँ थपिएको छ र विजेतालाई शिल्ड, नगद र प्रमाणपत्र दिइनेछ।

उत्कृष्ट स्टल छान्न पनि छुट्टै प्रतिस्पर्धा हुनेछ। गोदावरी फूलको व्यावसायिक उत्पादन, विस्तार र प्रवर्द्धन प्रदर्शनीको उद्देश्य रहेको आयोजकले जनाएको छ।