राष्ट्रपतिसँग स्विस राष्ट्रिय परिषद्का अध्यक्षको भेट, जलवायु र हिमाली क्षेत्रमा सहकार्यको चासो

राष्ट्रपति रामचन्द्र पौडेलले जलवायु परिवर्तनको असर र हिमाली वातावरणका समस्या समाधान गर्न नेपाल स्विट्जरल्यान्डसँग मिलेर काम गर्न चाहन्छ भन्नुभएको छ। नेपाल भ्रमणमा आएका स्विट्जरल्यान्डको राष्ट्रिय परिषद्का अध्यक्ष पियरे आन्द्रे पेजको नेतृत्वको प्रतिनिधिमण्डलसँग सोमबार शीतल निवासमा भएको शिष्टाचार भेटमा राष्ट्रपतिले यस्तो धारणा राख्नुभएको हो। राष्ट्रपतिका प्रेस सल्लाहकार किरण पोखरेलका अनुसार राष्ट्रपति पौडेलले नेपालको शान्ति प्रक्रियामा स्विस सरकारले दिएको सहयोगको प्रशंसा गर्नुभएको छ।

लोकतन्त्र, सङ्घीयता, स्थानीय शासन र सामाजिक आर्थिक विकासमा स्विट्जरल्यान्डको लामो सहयोगलाई पनि उहाँले सम्झनुभएको छ। अध्यक्ष पेजले हिमालहरू चलायमान भइरहेको उल्लेख गर्दै पूर्वसूचनाको विषय उठाउनुभएको छ र नेपालसँगको सहकार्यमा जोड दिनुभएको छ। अध्यक्ष पेज ६ सदस्यीय संसदीय प्रतिनिधिमण्डलको नेतृत्व गर्दै प्रतिनिधि सभाका सभामुखको निमन्त्रणामा नेपाल आउनुभएको हो।

प्रतिनिधिमण्डलले सभामुख र राष्ट्रिय सभाका अध्यक्ष नारायणप्रसाद दाहालसँग पनि भेट गरेको छ। अध्यक्ष दाहालले दुई देशबीच कूटनीतिक सम्बन्धको ७०औँ वर्ष मनाइरहेको र नेपाल–स्विस संसदीय मैत्री समूह गठन भएको जानकारी दिनुभएको छ। भेटहरूमा नेपालमा पछिल्लो विपद्पछिको पुनर्निर्माण र संसदीय सम्बन्धबारे छलफल भएको सङ्घीय संसद सचिवालयले जनाएको छ।

सभामुख र अध्यक्ष पेजले पाटन सङ्ग्रहालयमा एउटा फोटो प्रदर्शनीको संयुक्त उद्घाटन गर्नुभएको छ। भ्रमण तालिकाअनुसार कात्तिक २० गते प्रतिनिधिमण्डलको नेपाल–स्विट्जरल्यान्ड संसदीय मैत्री समूहसँग कार्यक्रम छ।