पुस १ देखि स्वास्थ्य बीमामा राष्ट्रिय परिचयपत्र अनिवार्य, विवरण प्रमाणीकरण नभए पनि अन्य सेवा नरोकिने

आगामी पुस १ गतेदेखि स्वास्थ्य बीमामा नयाँ आबद्धता, नवीकरण र सेवा लिन राष्ट्रिय परिचयपत्र अनिवार्य हुने भएको छ। स्वास्थ्य बीमा बोर्डले कात्तिक १२ गते गरेको निर्णयअनुसार यो व्यवस्था १६ वर्ष उमेर पुगेका नागरिकमा लागू हुनेछ। उनीहरूले आबद्धता र नवीकरणका बेला परिचयपत्र नम्बर पेस गर्नुपर्नेछ।

भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयले कात्तिक १६ गते परिपत्र गर्दै सबै गाउँपालिका र नगरपालिकालाई कार्यान्वयनमा समन्वय गर्न आग्रह गरेको छ। यसैबीच, राष्ट्रिय परिचयपत्र तथा पञ्जीकरण विभागले परिचयपत्रको विवरण प्रमाणीकरण नभए पनि सार्वजनिक सेवा नरोकिने जनाएको छ। सोमबार जारी सूचनामा विभागले राहदानी, बैंक तथा वित्तीय सेवा र सवारी चालक अनुमतिपत्र लिन समस्या नहुने उल्लेख गरेको छ।

प्रमाणीकरणमा ढिलाइ भए पनि सेवा नरोक्न विभागले सम्बन्धित निकायलाई आग्रह गरेको छ। विभागका अनुसार नागरिकको विवरण दर्ता र परिचय नम्बर जारी गर्ने काम नियमित रूपमा चलिरहेको छ। असोज १ पछि परिचय नम्बर लिएका केही नागरिकको प्रमाणीकरण स्वचालित बायोमेट्रिक प्रणालीको क्षमताका कारण ढिलो भएको हो।